ఆరునెలల్లో రూ.వెయ్యికోట్ల వ్యాపారం

కేడీసీసీ బ్యాంకు ఛైర్మన్‌ నాగేశ్వరరావు

పాలకవర్గసభ్యులతో సమావేశమైన ఛైర్మన్‌ నాగేశ్వరరావు

మచిలీపట్నం కార్పొరేషన్‌, న్యూస్‌టుడే: తమ పాలకవర్గం ఏర్పడిన ఆరునెలల్లో రూ. వెయ్యికోట్ల వ్యాపారం చేశామని కేడీసీసీ బ్యాంకు ఛైర్మన్‌ తన్నీరు నాగేశ్వరరావు తెలిపారు. ప్రస్తుతం ఉన్న పాలకవర్గ గడువును పెంచడంతోపాటు ఒక సభ్యుడిని కొత్తగా నియమించడంతో శుక్రవారం మచిలీపట్నంలోని బ్యాంకు ఆవరణలో సభ్యులతో సమావేశం నిర్వహించారు. ఈ సందర్భంగా ఆయన మాట్లాడుతూ ఈ ఏడాది మార్చి నాటికి మరో వెయ్యికోట్ల వ్యాపారం చేయాలని లక్ష్యంగా పెట్టుకున్నామని అన్నారు. బ్యాంకు ద్వారా విస్తృత సేవలు అందిస్తున్నామని ఇందులో భాగంగానే బ్యాంకులోని సభ్యులకు ఎల్‌ఐసీ ద్వారా బీమా సౌకర్యం కల్పించేలా చర్యలు తీసుకుంటున్నామని తెలిపారు. జిల్లావ్యాప్తంగా ఆయా బ్రాంచిల్లో 18 నుంచి 59 ఏళ్ల వయసు కలిగిన వారికే బీమా వర్తిస్తుందని అలాంటి వారు 1.20లక్షల మంది ఉన్నట్లు గుర్తించామన్నారు. జిల్లా వ్యాప్తంగా స్వయం సహాయసంఘాలకు ఇచ్చే రుణపరిమితిని కూడా రూ.20లక్షలకు పెంచుతున్నామన్నారు. ప్రస్తుతం బ్యాంకు ద్వారా 8,500 సంఘాలు రుణాలు పొందుతున్నాయని, మరో 4వేల సంఘాలకు పెంచాలని నిర్ణయించుకున్నట్లు తెలిపారు. ఈ ఏడాది మార్చినాటికి రూ.500కోట్ల డిపాజిట్‌లు సేకరించేలా లక్ష్యాన్ని నిర్దేశించుకున్నామన్నారు. పాలకవర్గ సభ్యులు నల్లమోతు కోటిసూర్య ప్రకాశరావు, కొమ్మినేని రవిశంకర్‌, గుమ్మడపు రవీంద్రరాణా, గడిదేశి పెదవెంకయ్య, పడమట సుజాత, భూక్యారాణిలతోపాటు సీఈవో శ్యామ్‌మనోహర్‌, పలువురు అధికారులు పాల్గొన్నారు. ఛైర్మన్‌తోపాటు కొత్తగా సభ్యునిగా నియమితులైన రవీంద్రరాణాను పలువురు సభ్యులు సత్కరించారు.