చిరుప్రాయంలోనే వరల్డ్‌, ఇండియా బుక్‌లో చోటు

నితీష వర్మ గొట్టుముక్కల

నెహ్రూచౌక్‌ (గుడివాడ), న్యూస్‌టుడే : చిరుప్రాయంలోనే ఎంతో కఠినమైన శాస్త్రీయ నామాలను సైతం అనర్గళంగా పలకడమే కాకుండా వరల్డ్‌, ఇండియా బుక్‌ ఆఫ్‌ రికార్డులో చోటు దక్కించుకుంది ఆ చిన్నారి. ఆమే గొట్టుముక్కల నితీషవర్మ. ఈ పాప వయస్సు 4 ఏళ్ల 9 నెలలు. కృష్ణాజిల్లా గుడివాడ టీచర్సు కాలనీలో నివాసం. చిన్నతనం నుంచి ప్రత్యేక ప్రతిభతో ఉండే నితీషవర్మను గమనించిన తల్లి మధు పాపకు కష్టతరమైన శాస్త్రీయ పదాలను ఉగ్గుపాలతో నేర్పించింది. 30 సెకన్ల వ్యవధిలో 30 జంతువుల శాస్త్రీయ నామాలు స్పష్టంగా పలికి ప్రతిభ చాటడంతో వరల్ట్‌ బుక్‌ ఆఫ్‌ రికార్డు, ఇండియా బుక్‌ ఆఫ్‌ రికార్డులను అతి పిన్న వయసులోనే సాధించింది. ఇంకా పలు రికార్డులను కైవసం చేసుకునేందుకు పాపకి శిక్షణ ఇస్తున్నామని తల్లి మధు ‘న్యూస్‌టుడే’కు తెలిపారు. ఈ సందర్భంగా చిన్నారిని పలువురు అభినందించారు.