సృజన్‌ సింగ్‌ కుటుంబానికి అండగా ఉంటాం

భాజపా రాష్ట్ర అధ్యక్షుడు సోము వీర్రాజు

నంద్యాల పాతపట్టణం, న్యూస్‌టుడే: ఇటీవల మత విద్వేషాలను రెచ్చగొట్టే విధంగా పోస్టులు చేసిన నంద్యాలకు చెందిన సృజన్‌ సింగ్‌ను పోలీసులు అరెస్టు చేసిన విషయం విదితమే. రాయలసీమ పర్యటనలో భాగంగా బుధవారం రాత్రి భాజపా రాష్ట్ర అధ్యక్షుడు సోము వీర్రాజు సృజన్‌సింగ్‌ కుటుంబీకులను పరామర్శించారు. ఎలాంటి ఆందోళన చెందాల్సిన అవసరం లేదని, భాజపా అండగా ఉంటుందని కుటుంబానికి భరోసా కల్పించారు. ఆయన మాట్లాడుతూ రాష్ట్ర ప్రభుత్వం, పోలీసు యంత్రాంగం ఆత్మకూరులో జరిగిన ఘటనపై నిష్పక్షపాతంగా వ్యవహరించాలన్నారు. పోలీసు, రెవెన్యూ వ్యవస్థలు గాడి తప్పితే ప్రజాస్వామ్యానికి విఘాతం కలుగుతుందన్నారు. హిందూ మనోభావాలను గౌరవించే విధంగా ప్రభుత్వం, పోలీసులు చర్యలు తీసుకోవాలని కోరారు. భాజపా రాష్ట్ర నాయకులు తూముశివారెడ్డి, పట్టణాధ్యక్షుడు బ్రహ్మం తదితరులు పాల్గొన్నారు.