రూ.70 వేలు కాజేసిన వాలంటీర్‌

గడివేముల, న్యూస్‌టుడే : రైతు భరోసా సాయం అందేలా చూస్తానని పత్రంపై వేలిముద్రలు వేయించుకున్న  వాలంటీరు మహిళ ఖాతాలో రూ.70 వేలు కాజేసిన ఘటన గడివేముల మండలం తిరుపాడులో చోటుచేసుకుంది. బాధితురాలు నాగవేణి శుక్రవారం పోలీసులను ఆశ్రయించారు. ఆమె కథనం ప్రకారం..  రైతు భరోసా డబ్బులు జమ కాకపోవడంతో తిరుపాడు గ్రామ వాలంటీరు బాలమద్దులును ఆశ్రయించా. రెండ్రోజుల కిందట పత్రాలపై వేలిముద్రలు తీసుకున్నాడు.. సరిగా పడలేదని  రెండుసార్లు తీసుకున్నాడు.. ఆధార్‌కార్డు తీసుకెళ్లాడు..  తర్వాత ఖాతాలో డబ్బు డ్రా చేసినట్లు చరవాణికి సమాచారం వచ్చింది.. వెంటనే బ్యాంకుకు వెళ్లి విచారించాం.. ఎక్కడైనా వేలిముద్ర వేశావా.. ఎవరికైనా ఆధార్‌కార్డు ఇచ్చావా అని బ్యాంకు అధికారులు ప్రశ్నించారన్నారు.  వాలంటీరే   నగదు కాజేసినట్లు తేలడంతో పోలీసులకు ఫిర్యాదు చేశామన్నారు.   పలు ఫిర్యాదులు రావడంతో తిరుపాడు వాలంటీరు బాలమద్దులును సస్పెండ్‌ చేసినట్లు గడివేముల ఎంపీడీవో విజయసింహారెడ్డి తెలిపారు.