పప్పుగుత్తితో తల్లిని చంపిన కుమారుడు

కౌతాళం, న్యూస్‌టుడే: మండలంలోని ఎరిగేరి గ్రామానికి చెందిన బోయ హనుమంతమ్మ, లోహితయ్య దంపతులకు ముగ్గురు కుమార్తెలు, ఒక కుమారుడు సంతానం. అందరికి పెళ్లిళ్లు చేశారు. దంపతులిద్దరూ తమకున్న మూడెకరాలు సాగు చేసుకుంటూ కుమారుడి వద్దనే ఉంటున్నారు. ఆస్తిని అందరికీ సమానంగా పంచాలని తల్లి చెబుతుండేవారు. ఆస్తిని ఆడపిల్లలకూ పంచుతారేమోనన్న అనుమానంతో తల్లి హనుమంతమ్మపై గురువారం పప్పు గుత్తితో దాడిచేశాడు. వెంటనే కుటుంబీకులు ఆదోని ఆసుపత్రికి తరలించారు. మెరుగైన వైద్యం కోసం కర్నూలు ఆసుపత్రికి తరలించారు. అక్కడ చికిత్స పొందుతూ మృతి చెందినట్లు పోలీసులు తెలిపారు. మృతురాలి భర్త లోహితయ్య ఫిర్యాదు మేరకు కుమారుడు లింగన్నపై కేసు నమోదు చేసి దర్యాప్తు చేస్తున్నట్లు ఎస్సై నరేంద్రకుమార్‌ రెడ్డి తెలిపారు.