అక్టోబరు 14న చంద్రబాబు పర్యటన

తెలుగు దేశం పార్టీ జాతీయ అధ్యక్షులు నారా చంద్రబాబునాయుడు వచ్చే నెల అక్టోబరు 14న కర్నూలులో పర్యటించనున్నారు. ఇందుకు సంబంధించి కర్నూలు పార్లమెంట్‌ తెదేపా నేతలు ఏర్పాట్లు చేస్తున్నారు.హైదరాబాద్‌ నుంచి పుట్టపర్తికి విమానంలో చేరుకుని అనంతపురంలో 12న నిర్వహించే మినీ మహానాడులో పాల్గొంటారు. అనంతరం 13న పుట్టపర్తిలో నేతలతో సమీక్షించి గుత్తి నుంచి రోడ్డు మార్గంలో పత్తికొండ రానున్నారు. పత్తికొండతోపాటు, మంత్రాలయం (కోసిగి) లేదా ఎమ్మిగనూరులో పర్యటించే అవకాశం ఉందని కర్నూలు పార్లమెంట్‌ అధ్యక్షులు సోమిశెట్టి వెంకటేశ్వర్లు తెలిపారు. 13న సాయంత్రం పత్తికొండలో పర్యటించి అక్కడ రాత్రి బస చేస్తారా? లేక పుట్టపర్తిలోనే 13న రాత్రి బస చేసి 14న ఉదయం పత్తికొండ, సాయంత్రం మంత్రాలయం, ఎమ్మిగనూరులో ఓ చోట రోడ్‌ షో చేస్తారా? అనే అంశంపై చర్చలు జరుగుతున్నాయి. - ఈనాడు, కర్నూలు