కాల్వలు లేక అవస్థలు పడుతున్నాం

మంత్రికి సమస్య చూపుతున్న ఎస్సీ కాలనీవాసులు

ఆలూరు, న్యూస్‌టుడే: ‘దారంతా మురుగుమయంగా మారింది. రోజూ రాకపోకలు కొనసాగించేందుకు ఇబ్బందులు పడుతున్నాం. కాల్వలు వేయించి మా అవస్థలు తీర్చాలని’ ఆలూరు మండలం కురవళ్లి ఎస్సీ కాలనీవాసులు మంత్రికి విన్నవించారు. ఆలూరు మండలంలోని కురవళ్లి గ్రామంలో శనివారం గడప గడపకు మన ప్రభుత్వం కార్యక్రమంలో మంత్రి గుమ్మనూరు జయరాం పాల్గొన్నారు. ఈ సందర్భంగా స్థానికులు నిల్వ ఉన్న మురుగును ఆయనకు చూపించారు. కాల్వలు లేకపోవడంతో వర్షం నీటితోపాటు మురుగంతా రోడ్డుపైనే నిలిచిపోతుందని వివరించారు. స్పందించిన మంత్రి వెంటనే కాలనీలో మురుగుకాల్వలు ఏర్పాటు చేయించాలని అధికారులకు ఆదేశించారు. కార్యక్రమంలో జడ్పీటీసీ సభ్యుడు ఏరూరు శేఖర్‌, ఎంపీపీ శ్రీరాములు, సర్పంచి రవి తదితరులు పాల్గొన్నారు.