పంచాయతీలకు ఆర్థిక సంఘం నిధులు

 రూ.22.54 కోట్ల విడుదల

కర్నూలు నగరం, న్యూస్‌టుడే: 2021-22 ఆర్థిక సంవత్సరానికి సంబంధించి 15వ ఆర్థిక సంఘం నిధులు రెండో విడత కింద ఉమ్మడి జిల్లాకు రూ.22.54 కోట్లు విడుదలయ్యాయి. ఈ మేరకు కర్నూలు డీపీవో కార్యాలయానికి పంచాయతీరాజ్‌ కమిషనర్‌ కార్యాలయం నుంచి మంగళవారం అధికారిక సమాచారం అందింది. కర్నూలు జిల్లాలో 484 పంచాయతీలకుగాను ఆదోని మండలం సాదాపురం, మండగిరి పంచాయతీలకు ఎన్నికలు జరగలేదు. ఈ నేపథ్యంలో 482 పంచాయతీలకు రూ.11.93 కోట్లు విడుదలయ్యాయి.
* నంద్యాల జిల్లాలో 482 పంచాయతీలు ఉండగా సున్నిపెంట పంచాయతీకి ఎన్నికలు జరగలేదు. మిగిలిన 481 పంచాయతీలకు రూ.10.60 కోట్లు వచ్చాయి. ఈ నిధులు పాత విధానం (సీఎంఎఫ్‌ఎస్‌) ద్వారా జిల్లా ఖజానాకు జమవుతాయని, అనంతరం సంబంధిత సర్పంచుల ఖాతాలకు జమ చేయాలని ప్రభుత్వ ఆదేశించిందని కర్నూలు జిల్లా పంచాయతీ అధికారి టి.నాగరాజనాయుడు తెలిపారు. ఏ పంచాయతీకి ఎన్ని నిధులు కేటాయించారనే వివరాల జాబితాను ఖజానా శాఖ కార్యాలయానికి పంపుతామని చెప్పారు.
* పాత పద్ధతి ప్రకారం జిల్లా ట్రెజరీ ద్వారా నిధులు విడుదల చేయడాన్ని పరిశీలిస్తే రాష్ట్ర ప్రభుత్వం ఎప్పుడు నిదులు ఇస్తే.. అప్పుడు పంచాయతీలకు కాసులు వచ్చే  పరిస్థితి ఏర్పడనుంది. ఈ విధానంతో కథ మళ్లీ మొదటికి వస్తుందని సర్పంచులు ఆందోళన చెందుతున్నారు. అసలు నిధులు చేతికి వస్తాయో.. లేదో అని పలువురు పేర్కొంటున్నారు.