అహోబిలంలో వేదాంత దేశికన్ జయంతి వేడుకలు

ఆళ్లగడ్డ గ్రామీణం : ప్రముఖ వైష్ణవ క్షేత్రమైన అహోబిలంలో వేదాంత దేశికన్ జయంతి వేడుకలు ఘనంగా నిర్వహించారు. బుధవారం ఉదయం ప్రహ్లాద వరద స్వామి శ్రీదేవి భూదేవి అమ్మవారితో పాటు వేదాంత దేశికన్ స్వామికి నవకలశాలతో, పంచామృతాలతో అభిషేకం చేశారు. అనంతరం ప్రత్యేకంగా అలంకరించారు. పల్లకిపై కొలువుదీర్చి ఆలయ తిరువీధుల్లో ఊరేగించారు. సాయంత్రం విజయదశమి పండుగ సందర్భంగా ప్రహ్లాద వరద స్వామి పారువేటకు బయలుదేరారు. ఆలయం నుంచి ఊరేగింపుగా బయలుదేరిన స్వామి జమ్మి చెట్టు వద్దకు చేరుకోగా.. అర్చకులు సంప్రదాయబద్ధంగా పూజలు చేశారు. ఆలయ ఈవో రామకృష్ణ, ప్రధాన అర్చకుడు వేణుగోపాలన్ ఆధ్వర్యంలో ఉత్సవాలు నిర్వహించారు.