కరవు కాటేసింది

సౌజన్య

బుద్ధిగా ఉంటే చెవి దుద్దులు తెస్తానంటూ ఆనందంగా వెళ్లిన అమ్మకు.. విషాదమే మిగిలింది. చెప్పిన మాట వింటే గుప్పెడు చాక్లెట్లు ఇస్తానన్న నాన్నకు చేదు మాట చెవికి చేరింది. పూట గడవక పొట్ట చేతపట్టుకుని పొరుగు రాష్ట్రానికి వలస వెళ్లిన వారికి కడుపు కోతే మిగిలింది. కరవు మాటేసి వారిని ఊరు నుంచి తరిమేసింది..   విషపురుగు కాటేసి చిన్నారిని దూరం చేసింది. ఊరికి దూరంగా.. మనసు భారంగా.. ఉన్నవారు అష్టకష్టాలు పడుతూ స్వగ్రామం చేరుకున్నారు. పాముకాటుతో మృతి చెందిన చిన్నారిని హత్తుకుని గుండెలవిసేలా విలపించారు.

దేవనకొండ మండలం కరివేములకు చెందిన వీరేశ్‌, భారతి దంపతులకు కుమారుడు, కుమార్తె ఉన్నారు. గ్రామంలో కూలీ పనులకు వెళ్లి జీవించేవారు. పనులు లేకపోవడంతో ఉపాధి కోసం దంపతులు అక్టోబరులో తెలంగాణ రాష్ట్రానికి వలస వెళ్లారు. వారి ఇద్దరు పిల్లలను ఇంటి వద్దే అవ్వాతాత, పిన్ని, బాబాయి వద్ద వదిలి వెళ్లారు. గురువారం మధ్యాహ్నం చిన్నారి సౌజన్య (6) గుడిసెలో మంచంపై కూర్చొని చరవాణి చూస్తూ అన్నం తింటుండగా విషపురుగు కాటేసింది. చిన్నారి ఏదో ఎలుక కొరికిందని తాత, బాబాయికి చెప్పింది. కుటుంబ సభ్యులు చిన్నారి కాలుపై పాము కాట్లు గుర్తించడంతో వెంటనే కోడుమూరు ఆసుపత్రికి తరలించారు. అప్పటికే పాప మృతి చెందినట్లు వైద్యులు చెప్పడంతో కుటుంబ సభ్యులు కన్నీటి పర్యంతమయ్యారు.

-న్యూస్‌టుడే, దేవనకొండ