నిధులివ్వరు.. మాటకు విలువ ఉండదు

సర్వసభ్య సమావేశంలో సభ్యుల ఆవేదన
సభకు హాజరుకాని ఎమ్మెల్యేలు, ఎంపీలు

సభలో మాట్లాడుతున్న మంత్రి బుగ్గన, కలెక్టర్లు కోటేశ్వరరావు, మనజీర్‌ జిలానీ

గత రెండు సమావేశాల్లో తాము చెప్పిన సమస్యలు పట్టించుకోలేదు.. కనీసం అధికారులు ప్రతిపాదనలు రూపొందించలేదు.. పలు పనుల్లో చోటుచేసుకున్న అక్రమాలను ప్రస్తావించినా క్షేత్రస్థాయిలో విచారణ చేయలేదు.. ఇలాంటి సమావేశాలు ఎందుకని జడ్పీటీసీ సభ్యులు ఆందోళన వ్యక్తం చేశారు. నిధులు ఇవ్వరు.. మాటకు విలువ ఉండదంటూ ఆవేదన వ్యక్తం చేశారు. జిల్లా పరిషత్‌ ఛైర్మన్‌ ఎర్రబోతుల పాపిరెడ్డి అధ్యక్షతన మంగళవారం సర్వసభ్య సమావేశం జరిగింది. ఆర్థిక, ప్రణాళికశాఖ మంత్రి బుగ్గన రాజేంద్రనాథ్‌రెడ్డి, కలెక్టర్లు కోటేశ్వరరావు, మనజీర్‌ జిలానీ, జడ్పీ సీఈవో నాసరరెడ్డి, ఉప సీఈవో సుబ్బారెడ్డితోపాటు వివిధ శాఖ అధికారులు, జడ్పీటీసీ సభ్యులు, ఎంపీపీలు హాజరయ్యారు. ఏడాది నుంచి ‘గౌరవం లేదు.. వేతనం లేదని’ ఎంపీపీలు ఆవేదన వ్యక్తం చేశారు.

వచ్చింది ఇద్దరే

సమావేశానికి ఎమ్మెల్యేలు బ్రిజేంద్రనాథ్‌రెడ్డి, డాక్టర్‌ జె.సుధాకర్‌ మినహా మిగిలిన ఎమ్మెల్యేలు గైర్హాజరయ్యారు. జడ్పీ పాలకవర్గం ఏర్పడినప్పటి నుంచి ఇప్పటిదాకా జరిగిన సమావేశాలకు జిల్లాలోని ఇద్దరు ఎంపీలు హాజరు కాలేదు. ఒక్కో ఎంపీ పరిధిలో ఏడాదికి రూ.5 కోట్ల (ఎంపీ ల్యాడ్స్‌) నిధులు కేంద్రం కేటాయిస్తుంది.  ఇలాంటి సమావేశాలకు హాజరైతే ఎంపీపీ, జడ్పీటీసీ సభ్యులు ప్రస్తావించే ప్రజా సమస్యల పరిష్కారానికి తమ కోటా నుంచి నిధులు విడుదల చేసేందుకు అవకాశముంటుంది.

-న్యూస్‌టుడే, కర్నూలు జడ్పీ