ఇదేం ఖర్మ మన రాష్ట్రానికి కార్యక్రమాన్ని విజయవంతం చేద్దాం

సమావేశం నిర్వహిస్తున్న మాజీ ఎమ్మెల్యే భూమా బ్రహ్మానందరెడ్డి

నంద్యాల గ్రామీణం, న్యూస్‌టుడే : చేయి చేయి కలిపి ఇదేం ఖర్మ మన రాష్ట్రానికి కార్యక్రమాన్ని విజయవంతం చేద్దామని మాజీ ఎమ్మెల్యే భూమా బ్రహ్మానందరెడ్డి పిలుపునిచ్చారు. పట్టణంలోని ఆయన నివాసంలో గురువారం నంద్యాల మండల తెదేపా కార్యకర్తల సమావేశం నిర్వహించారు. ఈసందర్భంగా ఆయన మాట్లాడుతూ.. గత మూడున్నరేళ్లుగా వైకాపా ప్రభుత్వం అనేక ప్రజా వ్యతిరేక విధానాలు అవలంబించి జనాన్ని ఇబ్బందులకు గురిచేస్తోందన్నారు. తెదేపా కార్యకర్తలు, నాయకులు ఇదేం ఖర్మ మన రాష్ట్రానికి కార్యక్రమం ద్వారా వైకాపా ఆగడాలను ప్రజల్లోకి తీసుకెళ్లడం ద్వారా మద్దతు కూడగట్టాలన్నారు. మండల కన్వీనర్‌ గురునాథరెడ్డి, పార్లమెంటు తెదేపా అధికార ప్రతినిధి నరేంద్రకుమార్‌రెడ్డి, పార్లమెంటు తెదేపా కార్యాలయ కార్యదర్శి చిలుకూరి రవిబాబు తదితరులు పాల్గొన్నారు.