గడప గడపకు ఆలస్యంపై ఎమ్మెల్యే చిర్రుబుర్రు

సచివాలయ ఉద్యోగులతో మాట్లాడుతున్న ఎమ్మెల్యే సాయిప్రసాద్‌రెడ్డి

ఆదోని మార్కెట్‌, న్యూస్‌టుడే: ‘కార్యక్రమం ఎన్ని గంటలకు మొదలవ్వాలి. ఎన్నింటికి వస్తున్నారు. సమయానికి రావడానికి రాదా? ఇలాగే చేస్తే.. శని, ఆదివారాలు కూడా నిర్వహిస్తాం చూడండి’. అని ఆదోని ఎమ్మెల్యే సాయిప్రసాద్‌రెడ్డి సచివాలయ ఉద్యోగులపై చిర్రుబుర్రులాడారు. బుధవారం ఉదయం 9గంటలకు నిర్వహించాల్సిన గడప గడపకు.. మన ప్రభుత్వ కార్యక్రమం 11గంటలకు ప్రారంభిస్తే.. ఎలా అని ప్రశ్నించారు. ఆదోని పట్టణంలోని నాలుగోవ వార్డులో ఎమ్మెల్యే పర్యటనకు వెళ్లే సమయంలో సచివాలయ ఉద్యోగులు కనిపించారు. ఇంత ఆలస్యమైతే ఎలా? మేము గడప గడపకు కార్యక్రమంలో తిరగలేక ఇబ్బందులు పడుతుంటే.. మీరు కూడా ఇలా ఆలస్యంగా వస్తే ఎలా అన్నారు. ఇలాగైతే సెలవు రోజుల్లో సైతం వదలకుండా కార్యక్రమం నిర్వహించాల్సి వస్తుందని ఎమ్మెల్యే అన్నారు. అనంతరం వార్డులో తిరుగుతూ ప్రజల నుంచి సమస్యలు అడిగి తెలుసుకున్నారు.