పెళ్లింట విషాదం

ధర్మన్న(పాత చిత్రం)

మంత్రాలయం , న్యూస్‌టుడే: కుమారుడి నిశ్చితార్థ వేడుకతో ఆ ఇంట్లో కలిగిన ఆనందం.. కొన్ని గంటల్లోనే తొలగి పోయింది. వరుడి తండ్రి గుండెపోటుకు గురై మరణించడంతో విషాదం అలుముకుంది.  మంత్రాలయం మండలం సూగూరు గ్రామానికి చెందిన ధర్మన్న, లక్ష్మిలకు నలుగురు సంతానం. ఇద్దరు కుమార్తెలకు వివాహం చేసిన ఆయన శుక్రవారం ఉదయం కుమారుడు మల్లేశ్‌కు నిశ్చితార్థం చేయాలనుకున్నారు. అయితే ధర్మన్నకు అనారోగ్యంగా ఉండడంతో తండ్రితోపాటు తల్లిని అతడికి తోడుగా ఇంటి వద్దే ఉంచి, మిగిలిన కుటుంబీకులంతా ఇబ్రహీంపురంలో మల్లేశ్‌ నిశ్చితార్థ వేడుకకు వెళ్లారు. వధువు ఇంట్లో జరిగే వేడుకల్లో వారంతా సంతోషంగా ఉండగానే.. ఇంటివద్ద ఉన్న తండ్రి ధర్మన్న(50)కు గుండెపోటు వచ్చింది. ఆస్పత్రికి తరలించేలోగా ఆయన మృతి చెందారు. అప్పటికే సంతోషంగా ఉన్న కుమారుడు, కుటుంబీకులు విషయం తెలుసుకుని విషాదంలో మునిగిపోయారు. పరుగున గ్రామానికి చేరుకుని కంటతడి పెట్టారు. నెల రోజుల్లో కుమారుడి వివాహం చూడాలన్న కోరిక తీరకుండా తండ్రి చనిపోయాడని ఇంటిల్లిపాదీ విలపించడం స్థానికులను కలచివేసింది.