కదం తొక్కిన అంగన్‌వాడీ కార్యకర్తలు

ఆందోళన చేస్తున్న అంగన్‌వాడీ కార్యకర్తలు

ఈనాడు-కర్నూలు, న్యూస్‌టుడే, బి.క్యాంప్‌ : కనీస వేతనం రూ.26 వేలకు పెంచాలని.. ముఖ ఆధారిత హాజరు విధానాన్ని రద్దు చేయాలని, పలు విభాగాల అధికారులు తనిఖీల పేరుతో వేధిస్తున్నారని.. దీనిని ఆపాలని అంగన్‌వాడీ వర్కర్లు, హెల్పర్లు డిమాండ్‌ చేశారు. తమ సమస్యలు పరిష్కరించాలని నినదిస్తూ కలెక్టరేట్‌ వద్ద సోమవారం ధర్నా చేశారు. రాష్ట్రవ్యాప్త ఆందోళనలో భాగంగా అంగన్‌వాడీ కార్యకర్తలు కలెక్టరేట్‌కు సోమవారం భారీగా తరలొచ్చారు. రహదారిపై బైఠాయించి నిరసన తెలిపారు. ఆంధ్రప్రదేశ్‌ అంగన్‌వాడీ వర్కర్స్‌, హెల్పర్స్‌ యూనియన్‌ గౌరవ అధ్యక్షురాలు పి.నిర్మల మాట్లాడుతూ అంగన్‌వాడీలను ప్రభుత్వ ఉద్యోగులుగా గుర్తిస్తామన్న హామీని నెరవేర్చలేదని ధ్వజమెత్తారు. యాప్‌లతో పని ఒత్తిడి పెంచి వేధింపులకు గురిచేస్తున్నారని ఆవేదన వ్యక్తం చేశారు. జిల్లా అధ్యక్షురాలు రేణుకమ్మ మాట్లాడుతూ విద్యాశాఖ మంత్రి ఇంట్లో పనివారికి అంగన్‌వాడీల ఏకరూప దుస్తులే కేటాయించి అవమానించారని, పనివాళ్లతో పోల్చారని ఆవేదన వ్యక్తం చేశారు. ఐసీడీఎస్‌ పీడీ రమాదేవి వారి నుంచి వినతిపత్రాన్ని స్వీకరించారు. సమస్యలను ఉన్నతాధికారులకు నివేదిస్తామని చెప్పడంతో వారు ఆందోళన విరమించారు.