తాఖీదులకు స్పందించని అధికారులు

చట్టపరమైన చర్యలకు సీఐడీ రంగం

కర్నూలు విద్య, న్యూస్‌టుడే: ఆర్‌యూ అధికారులపై చట్టపరమైన చర్యలు తీసుకునేందుకు సీఐడీ అధికారులు సిద్ధమవుతున్నట్లు తెలిసింది. రాయలసీమ విశ్వవిద్యాలయంలో బోధనేతర సిబ్బంది నియామకాల్లో అక్రమాలు జరిగాయని.. నకిలీ ధ్రువపత్రాలతో ఉద్యోగాలు పొందారని పలువురు విద్యార్థి సంఘాల నేతలు గతంలో సీఐడీకి ఫిర్యాదు చేశారు. ఈ నేపథ్యంలో తమకు పూర్తి సమాచారం ఇవ్వాలని ఆర్‌యూ ఉన్నత అధికారులకు సీఐడీ అధికారులు పది నెలల కింద నోటీసులు జారీ చేశారు. ఇప్పటివరకు నాలుగు సార్లు తాఖీదులు ఇచ్చినట్లు సమాచారం. 91 సీఆర్‌పీ నోటీసును 20 రోజుల కిందట ఇచ్చారు. 15 రోజుల్లో సమాధానం ఇవ్వకుంటే చర్యలు తీసుకుంటామని అందులో పేర్కొన్నట్లు తెలుస్తోంది. ఇచ్చిన గడువు ముగిసినా.. ఆర్‌యూ నుంచి సమాధానం రాలేదని.. ఈ నేపథ్యంలో చట్టపరమైన చర్యలు తీసుకొనేందుకు అవకాశం ఇవ్వాలని రాష్ట్ర సీఐడీ కార్యాలయాన్ని జిల్లా సీఐడీ అధికారులు కోరినట్లు సమాచారం.