అప్పులు తప్పించుకునేందుకు చోరీ నాటకం

ఓబులంపల్లె(ఆళ్లగడ్డ గ్రామీణం), న్యూస్‌టుడే: ఆళ్లగడ్డ మండలం ఓబులంపల్లె గ్రామంలో ఓ వ్యక్తి తన ఇంట్లో చోరీ జరిగిందంటూ ప్రచారం చేశాడు. తీరా పోలీసులు వచ్చి విచారణ చేపట్టగా అదంతా నాటకం అని తేలింది. స్థానికుల కథనం ప్రకారం.. గ్రామానికి చెందిన సద్దాం హుసేన్‌ ఇంట్లో చోరీ జరిగిందనే వార్త స్థానికంగా హల్‌చల్‌ చేసింది. పోలీసులు ఘటనాస్థలికి చేరుకొని చోరీ జరిగిన తీరును పరిశీలించారు. ఇంటికి తాళం వేసి పక్కనే ఉన్న టీ దుకాణంలో అతను నిద్రించగా, దొంగలు ఇంటి గూడు పగలగొట్టి లోనికి చొరబడి రూ.80 వేల నగదు, ఐదున్నర తులాల బంగారం దొంగలించారని సద్దాం హుసేన్‌ తెలిపాడు. పోలీసులు బాధితుడిని ఠాణాకు తరలించి విచారించగా చోరీ జరగలేదని, తానే ఇదంతా చేసినట్లు ఒప్పుకున్నాడు. అప్పుల నుంచి తప్పించుకొనేందుకు అతను నాటకం ఆడినట్లు పోలీసులు తెలిపారు.