ఉద్యోగులకు పూచీకత్తు పాట్లు

 26వ తేదీలోగా అందించాలని ఆదేశం

కర్నూలు నేరవిభాగం, న్యూస్‌టుడే : ఉమ్మడి కర్నూలు జిల్లాలోని ప్రభుత్వ మద్యం దుకాణాల్లో పనిచేసే ఉద్యోగులు పూచీకత్తు విషయంలో తీవ్ర ఒత్తిడికి గురవుతున్నారు. మద్యం దుకాణాల్లో పనిచేసే సూపర్‌వైజర్లు, సేల్స్‌మెన్‌లు రూ.3 లక్షల బాండుతోపాటు ఇద్దరు ప్రభుత్వ ఉద్యోగులు, మరో ఇద్దరు ప్రైవేటు వ్యక్తులతో పూచీకత్తు సంతకాలు చేయించిన పత్రాలు అందించాలని షరతు విధించిన సంగతి తెలిసిందే. లేదంటే ఉద్యోగాల నుంచి తొలగిస్తామని ఐఎంఎల్‌ డిపో మేనేజర్లు హెచ్చరికలు జారీ చేశారు. ఈనెల 10వ తేదీలోగా పూచీకత్తు సమర్పించాలని మొదట గడువు విధించారు. మళ్లీ 15వ తేదీకి పొడిగించారు. ఉమ్మడి కర్నూలు జిల్లాలో 162 మంది సూపర్‌వైజర్లు, 450 మంది సేల్స్‌మెన్‌లు ఉండగా కర్నూలు జిల్లాలో కేవలం ఇప్పటి వరకు 22 మంది సూపర్‌వైజర్లు, 30 మంది సేల్స్‌మెన్‌లు మాత్రమే పూచీకత్తు సమర్పించారు. చాలామంది వీటిని అందించేందుకు నానా అవస్థలు పడుతున్నారు. ఈ క్రమంలో గురువారం మళ్లీ ఐఎంఎల్‌ డిపో మేనేజర్లు మరో హెచ్చరిక జారీ చేశారు. 26వ తేదీలోగా పూచీకత్తు అందించకపోతే 28వ తేదీన ఉద్యోగం నుంచి తొలగిస్తామని, కొత్తవారిని తీసుకుంటామని స్పష్టం చేశారు.