మావైపు వచ్చేందుకు 30 మంది వైకాపా ఎమ్మెల్యేలు సిద్ధం

మాట్లాడుతున్న మంత్రాలయం తెదేపా బాధ్యుడు తిక్కారెడ్డి

కౌతాళం, న్యూస్‌టుడే: వైకాపాకు పోయే కాలం దగ్గర పడిందని, అసెంబ్లీ ఎన్నికల నాటికల్లా రాష్ట్రంలో అధికార వైకాపా నుంచి తెలుగుదేశం పార్టీలోకి 20 నుంచి 30 మంది ఎమ్మెల్యేలు తెదేపాలోకి చేరేందుకు సిద్ధంగా ఉన్నారని మంత్రాలయం తెదేపా బాధ్యుడు తిక్కారెడ్డి అన్నారు. ఎమ్మెల్యే కోటా ఎమ్మెల్సీ ఎన్నికల్లో తెదేపా అభ్యర్థి పంచుమర్తి అనురాధ విజయం సాధించిన నేపథ్యంలో గురువారం ఆయన విలేకరులతో మాట్లాడారు. పట్టభద్రుల ఎమ్మెల్సీ ఎన్నికల్లో మూడుకు మూడు స్థానాల్లో తెలుగుదేశం అభ్యర్థులు విజయం సాధించారని, దాన్నిబట్టి అధికార పార్టీపై ఎంత వ్యతిరేకత ఉందో తెలిసిపోయిందన్నారు. ఎమ్మెల్యే కోటా ఎమ్మెల్సీ ఎన్నికల్లో ఏడు స్థానాల్లో వైకాపా గెలిచేందుకు అవసరమైన ఓట్లు, ఎమ్మెల్యేలు ఉన్నా తెదేపా విజయం సాధించిందని, వైకాపాపై సొంత ఎమ్మెల్యేలే అసంతృప్తితో ఉన్నారో ఇట్టే తెలుస్తోందన్నారు. వచ్చే ఎన్నికల్లో వైకాపాను ఇంటికి సాగనంపేందుకు రాష్ట్ర ప్రజలు సిద్ధంగా ఉన్నారన్నారు. తెదేపా నాయకులు, కార్యకర్తలు కలసికట్టుగా పనిచేసి పార్టీ గెలుపునకు ప్రతి ఒక్కరు కృషి చేయాలన్నారు.