పాలకుల కారణంగానే సీమ వెనుకబాటు

మాట్లాడుతున్న శ్రీనివాసరెడ్డి

కర్నూలు సచివాలయం, న్యూస్‌టుడే: ఉమ్మడి ఆంధ్ర రాష్ట్రం నుంచి నేటి ప్రత్యేక నవ్యాంధ్రప్రదేశ్‌ వరకు అన్నివిధాలుగా నష్టపోయి, వెనుకబాటుతనానికి గురైంది రాయలసీమ వాసులేనని ఐజేయూ జాతీయ అధ్యక్షుడు కె.శ్రీనివాసరెడ్డి అన్నారు. సీమ అభివృద్ధికి ప్రజలు, పాలకులు, పాత్రికేయులు నడుం బిగించాల్సిన అవసరం ఉందన్నారు. ఆదివారం జిల్లా కేంద్రంలోని దేవీ ఫంక్షన్‌హాల్‌లో ఏపీయూడబ్ల్యూజే జిల్లా అధ్యక్షుడు కె.నాగరాజు అధ్యక్షతన ‘రాయలసీమ అభివృద్ధి- మీడియా పాత్ర’ అనే అంశంపై నిర్వహించిన సదస్సులో మాట్లాడారు. నాటి నుంచి నేటి వరకు అధికశాతం రాయలసీమకు చెందిన నేతలే ముఖ్యమంత్రులుగా వ్యవహరించారని, అయినా ఈ కరవుసీమ అభివృద్ధి గురించి ఆలోచించిన దాఖలాల్లేవన్నారు. కృష్ణా బేసిన్‌కు సంబంధించిన నీటి వాటాల విషయంలో ఇరురాష్ట్రాల ముఖ్యమంత్రుల సంప్రదింపులతో సమస్యను పరిష్కరించుకోవచ్చన్నారు. ఎగువభద్ర ప్రాజెక్టుతో సీమకు ఉరితాడు తప్పదని సామాజిక విశ్లేషకులు లక్ష్మీనారాయణ పేర్కొన్నారు. విభజనతో దారుణంగా నష్టపోయిన ప్రాంతం రాయలసీమ అని మాజీ ఎమ్మెల్యే గఫూర్‌, సీపీఐ రాష్ట్ర నాయకులు రామచంద్రయ్య పేర్కొన్నారు. రాయలసీమ సాగునీటి సాధన సమితి కన్వీనర్‌ బొజ్జా దశరథ రామిరెడ్డి, మేయర్‌ బి.వై.రామయ్య, భాజపా నాయకులు కపిలేశ్వరయ్య మాట్లాడారు.