అక్కడ నీడ.. ప్రయాణికులకు ఎండ

మేయర్‌ క్యాంపు కార్యాలయం వద్ద ఏర్పాట్లు

నగరంలో ఎండలు మండుతున్నాయి. పగటి ఉష్ణోగ్రతలు 40 డిగ్రీలు దాటుతున్నాయి. రానున్న రోజుల్లో ఎండ తీవ్రత మరింత ఎక్కువగా ఉంటుందని వాతావరణ శాఖ అధికారులు ఇప్పటికే హెచ్చరికలు జారీ చేశారు. మరోవైపు ఆయా కూడళ్లలో వాహనాలు నిలిచిన సమయంలో ఎండకు జనం అల్లాడుతున్నారు. ఇప్పటివరకు నగరంలో ఎక్కడా చలువ పందిళ్లు వేయలేదు. కొందరు ప్రజాప్రతినిధులపై మాత్రం నగరపాలక అధికారులు తమ స్వామిభక్తి చాటుతున్నారు. మేయర్‌ క్యాంపు కార్యాలయం వద్ద బయట ప్రాంతంలో చలువ పందిరి ఏర్పాటు చేశారు. దీనిని నగరపాలక అధికారులే సిద్ధం చేయించినట్లు తెలిసింది. అక్కడ పనిచేసిన కార్మికులను అడగ్గా నగరపాలక అధికారుల ఆదేశాలతోనే వేశారని చెప్పారు. ఇదే విషయాన్ని నగరపాలక ఇంజినీరింగ్‌ విభాగంలోని కొందరు అధికారులను వివరణ కోరగా నగరపాలక నిధులు వెచ్చించలేదని.. మేయర్‌ తన సొంత డబ్బులతో ఏర్పాటు చేయించుకున్నారేమో అని చెప్పడం గమనార్హం.

న్యూస్‌టుడే, కర్నూలు నగరపాలక సంస్థ