డ్వామాలో 141 మంది బదిలీ

కల్లూరు గ్రామీణ, న్యూస్‌టుడే: కర్నూలు జిల్లా పరిధిలోని డ్వామాలో భారీగా బదిలీలు జరిగాయి. హేతుబద్ధీకరణలో భాగంగా డ్వామా విభాగంలో అవసరానికి మించి అదనంగా పనిచేస్తున్న సిబ్బందిని ఇతర జిల్లాలకు బదిలీ చేశారు. చాలీచాలని జీతంతో అంతదూరం వెళ్లి ఎలా బతకాలని సిబ్బంది ఆందోళన చెందుతున్నారు. రూ.15 వేల నుంచి రూ.20 వేల వరకు జీతం తీసుకునేవారు ఇతర జిల్లాలకు వెళ్లేందుకు మొగ్గుచూపడం లేదు. డ్వామాలో మొత్తం 141 మంది బదిలీ అయ్యారు. అందులో టెక్నికల్‌ అసిస్టెంట్లు 81 మంది, సీవోలు 53, ఏపీవోలు 5, ఈసీలు 2 ఉన్నారు. వీరంతా సుదూర జిల్లాలకు బదిలీ కావడంతో ఆవేదన వ్యక్తం చేస్తున్నారు.