ఏడు గంటలు ఉక్కిరి బిక్కిరి

విద్యుత్తు సరఫరా లేక అల్లాడిన జనం
సీఎం వస్తున్నారని హడావుడిగా మరమ్మతులు

పత్తికొండ పట్టణం, న్యూస్‌టుడే: ముఖ్యమంత్రి పర్యటన నేపథ్యంలో పత్తికొండలోని ప్రధాన రహదారిలో విద్యుత్తు తీగలు సరిచేసే పనులను ఆశాఖ అధికారులు చేపట్టారు. ఆదివారం ఉదయం ఏడు గంటలకు ప్రభుత్వ జూనియర్‌ కళాశాల నుంచి పాత బస్టాండ్‌ అంబేడ్కర్‌ కూడలి వరకు విద్యుత్తు తీగలు తొలగించే పనులు మొదలు పెట్టారు. మధ్యాహ్నం 2 గంటల వరకు సరఫరా ఆపేయడంతో జనం తీవ్ర ఇబ్బందులు పడ్డారు. మూడు రోజులుగా ఇష్టానుసారంగా విద్యుత్తు సరఫరా ఆపేస్తున్నారని పలువురు వాపోయారు. ప్రభుత్వ కార్యాలయాల్లో అధికారులు ఇబ్బందులు పడ్డారు. ఫ్యాన్లు తిరగక, లైట్లు లేక చీకట్లోనే విధులు నిర్వహించారు.