భాషోపాధ్యాయులకు న్యాయం చేయాలి

మాట్లాడుతున్న ఏపీటీఎఫ్‌ 1938  రాష్ట్ర కార్యదర్శి నగిరి శ్రీనివాసులు

నంద్యాల పాతపట్టణం, న్యూస్‌టుడే : ప్రస్తుతం జరుగుతున్న బదిలీల ప్రక్రియలో పాఠశాల సహాయకుల తెలుగు, హిందీ ఖాళీలను బ్లాక్‌ చేయకుండా అన్ని ఖాళీలను చూపించి తెలుగు, హిందీ భాషోపాధ్యాయులకు న్యాయం చేయాలని ఏపీటీఎఫ్‌ 1938 రాష్ట్ర కార్యదర్శి నగిరి శ్రీనివాసులు పేర్కొన్నారు. స్థానిక కార్యాలయంలో శుక్రవారం జిల్లా నాయకులతో నిర్వహించిన సమావేశంలో ఆయన మాట్లాడారు. హిందీ, తెలుగు పాఠ్యాంశాల విషయంలో కోర్టులో కేసు నడుస్తున్నందున నూతనంగా మంజూరు చేసిన పాఠశాలలకు కేటాయించడం లేదన్నారు. తెలుగు, హిందీ ఉపాధ్యాయులకు చాలా తక్కువ ఖాళీలు ఉండడంతో సుదీర్ఘకాలం నుంచి దూర ప్రాంతాల్లో పనిచేస్తున్న వారికి మంచి స్థానాలు దక్కని పరిస్థితి నెలకొందన్నారు. నూతనంగా మంజూరైన తెలుగు 250, హిందీ 153 పోస్టులను అప్‌గ్రేడ్‌ చేశారని, ఆ ఖాళీలను ప్రస్తుత బదిలీల్లో చూపించకుండా బ్లాక్‌ చేయడం దారుణమని విమర్శించారు. కార్యక్రమంలో జిల్లా ప్రధాన కార్యదర్శి సాంబశివుడు, సభ్యులు పుల్లయ్య, పవన్‌కుమార్‌, మునిస్వామి, వెంకటేశ్వర్లు, గోపాలరావు, మద్దిలేటి  తదితరులు పాల్గొన్నారు.