వైభవంగా శ్రీవారి రథోత్సవ ఊరేగింపు

ఆదోని మార్కెట్: ఆదోని పట్టణంలో తితిదే ఆధ్వర్యంలో విశ్వహిందూ పరిషత్, శ్రీవారి భక్తుల సహకారంతో శ్రీ వేంకటేశ్వర స్వామి రథోత్సవ ఊరేగింపు  ఆదివారం  వైభవంగా జరిగింది. స్థానిక మంగళ ఆంజనేయస్వామి ఆలయం నుంచి భక్తులు సంప్రదాయ దుస్తులు ధరించి ఊరేగింపులో పాల్గొన్నారు. ఝాన్సీ రాణి, ఛత్రపతి శివాజీ మహారాజ్, శ్రీకృష్ణదేవరాయ వేషధారణలో చిన్నారులు ఆకట్టుకున్నారు. శ్రీ లక్ష్మీ పద్మావతి వెంకటేశ్వర స్వామి అలంకరణలో చిన్నారులు మైమరిపించారు. పురపాలక మైదానం వరకు ఊరేగింపు కొనసాగింది. పోలీసులు ప్రత్యేక బందోబస్తు నిర్వహించారు. కార్యక్రమంలో వీహెచ్‌పీ జిల్లా అధ్యక్షుడు బసవన్న గౌడ్, ధర్మ ప్రచార పరిషత్, తితిదే జిల్లా కార్యనిర్వాకులు మల్లారెడ్డి, మాజీ ఎమ్మెల్యే ప్రకాష్ జైన్‌తో పాటు పుర ప్రముఖులు, వివిధ రాజకీయ పార్టీల నాయకులు పాల్గొన్నారు.