నకిలీ పత్రాలతో లబ్ధి పొందిందెవరు?

వివరాలు అందించాలని ప్రభుత్వం ఆదేశం
ఆందోళనలో ఉద్యోగులు

ఈనాడు, కర్నూలు : ఉద్యోగ సంఘం నాయకులంటూ నకిలీ పత్రాలు సమర్పించి బదిలీ కాకుండా ఉన్న వారిపై విచారణ మొదలైంది. అలాంటివారిని గుర్తించి వివరాలు పంపించాలని అన్ని జిల్లాల కలెక్టర్లను ప్రభుత్వం ఆదేశించడం చర్చనీయాంశంగా మారింది. సంఘాల్లో క్రియాశీలకంగా ఉంటూ ఉద్యోగులు ఎదుర్కొంటున్న సమస్యలు పరిష్కరించేందుకు కృషి చేస్తున్న వారికి బదిలీల్లో కొన్ని మినహాయింపులు ఉన్నాయి. వారు అందిస్తున్న సేవల నేపథ్యంలో బదిలీని కొంతకాలం వాయిదా వేసుకునే వెసులుబాటును ప్రభుత్వం కల్పించింది. దీన్ని కొందరు దుర్వినియోగం చేసినట్లు ప్రభుత్వానికి ఫిర్యాదులు వెళ్లాయి. నకిలీ పత్రాలు అందించి బదిలీ కాకుండా చూసుకున్న వారి వివరాలు ఈనెల 14లోపు సమర్పించాలని కలెక్టర్లకు ఆదేశాలు అందాయి. వివరాలు ఎలా ఇవ్వాలన్న అంశాలపై ఒక పట్టిక నమూనాను రూపొందించారు.

ఆర్థిక లబ్ధి నేపథ్యంలో..

నగరంలో విధులు నిర్వర్తించేవారికి 16 శాతం హెచ్‌.ఆర్‌.ఎ. వస్తుందన్న విషయం తెలిసిందే. వీరు బదిలీ కాకుండా చూసుకుంటే ఆర్థిక లబ్ధి చేకూరుతుంది. అదనపు హెచ్‌.ఆర్‌.ఎ. రావడమేకాక దూర ప్రాంతాలకు రాకపోకలు సాగించేందుకు అయ్యే ఖర్చు ఆదా చేసుకోవచ్చు. అన్నింటికీ మించి విలువైన సమయం కలసివస్తుంది. వీటన్నింటినీ దృష్టిలో ఉంచుకుని పలువురు  నకిలీ పత్రాలు సమర్పించడం.. పలు సంఘాల నాయకులు పెద్ద సంఖ్యలో నకిలీ పత్రాలు         జారీ చేసినట్లు సమాచారం.