నారీ పరుగుల భేరి

పరుగు పరీక్షలో అభ్యర్థినులు

కర్నూలు నేరవిభాగం, న్యూస్‌టుడే: పోలీసుశాఖ ఎస్సై, ఆర్‌ఎస్సై నియామకాలకు సంబంధించి దేహదారుఢ్య పరీక్షల ప్రక్రియ శుక్రవారంతో ముగియనుంది. కర్నూలు ఏపీఎస్పీ రెండోపటాలంలో జరుగుతున్న ఈ ప్రక్రియ బుధవారంతో 19వ రోజుకు చేరింది. హాజరైన 1004 మంది పురుషులు, 96 మంది మహిళల ధ్రువీకరణపత్రాలు తనిఖీ చేసి వేలిముద్రలు సేకరించారు. పురుష అభ్యర్థులు ఎత్తు, ఛాతీకొలతలు పరిశీలించగా మహిళా అభ్యర్థినుల ఎత్తు, బరువు పరిశీలించారు. అర్హత సాధించిన వారికి వరుసగా 1600 మీటర్ల పరుగు, 100 మీటర్ల పరుగు, లాంగ్‌జంప్‌ పరీక్షలు నిర్వహించారు. 1600 మీటర్ల పరుగుపరీక్షలో 997 మంది పాల్గొనగా 767 మంది ఉత్తీర్ణులయ్యారు. వీరిలో 100 మీటర్ల పరుగు పరీక్షలో 481 మంది, లాంగ్‌జంప్‌లో 547 మంది ఉత్తీర్ణత సాధించారు. మొత్తం 591 మంది ప్రధాన రాతపరీక్షకు ఎంపికయ్యారు. కర్నూలు రేంజ్‌ డీఐజీ సెంథిల్‌కుమార్‌, ఎస్పీ జి.కృష్ణకాంత్‌, సెబ్‌ అదనపు ఎస్పీ కృష్ణకాంత్‌ పటేల్‌, కడప జిల్లా అదనపు ఎస్పీ తుషార్‌డుడీ హాజరై ప్రక్రియను పర్యవేక్షించారు.