చిన్నారి విక్రయానికి యత్నం.. అడ్డుకున్న పోలీసులు

జడ్చర్ల అర్బన్‌, న్యూస్‌టుడే : బాలుణ్ని తల్లిదండ్రులు అమ్మకానికి పెట్టగా.. పోలీసులు అడ్డుకున్న సంఘటన జడ్చర్లలో జరిగింది. ఎస్సై శంషుద్దీన్‌ తెలిపిన వివరాలు.. ముంబయిలో ఉంటున్న జడ్చర్ల దంపతులకు 18 ఏళ్లుగా సంతానం కలగకపోవడంతో కావేరమ్మపేటకు చెందిన ఆంజనేయులు, ఎల్లమ్మ, బాలమ్మకు ఫోన్‌ చేసి పెంచుకునేందుకు బాబు కావాలని, ఎవరైనా విక్రయిస్తే తీసుకురావాలని కోరారు. దీంతో ఈ ముగ్గురు కలిసి బాదేపల్లి పాతబజార్‌కు చెందిన సైదులు, సావిత్రి దంపతులను సంప్రదించారు. ఈ దంపతులకు ఇంతకుముందే ముగ్గురు పిల్లలుండగా.. మూణ్నెల్ల కిందట పుట్టిన మగ శిశువును రూ.30వేలకు అమ్మేందుకు ఒప్పందం జరుగుతుండగా సమీపంలోని ఓ వ్యక్తి 100కి ఫోన్‌ చేసి చెప్పారు. అక్కడికి వెళ్లి అందర్నీ అదుపులోకి తీసుకున్నామని, చట్టవ్యతిరేకంగా శిశువు విక్రయానికి పాల్పడిన వారిపై కేసు నమోదు చేసినట్లు ఎస్సై తెలిపారు.