విద్యుదాఘాతంతో యువకుడి మృతి

మధుకుమార్‌

మానవపాడు, న్యూస్‌టుడే : విద్యుదాఘాతంతో యువకుడు మృతి చెందిన ఘటన మండలంలో చోటు చేసుకుంది. కోదండాపురం ఎస్సై వెంకటస్వామి తెలిపిన వివరాల ప్రకారం.. బోరవెల్లి గ్రామానికి చెందిన కురువ కురుమన్న కుమారుడు మధుకుమార్‌(19) చెన్నకేశవస్వామి జాతర సందర్భంగా సోమవారం రాత్రి 9 గంటల సమయంలో స్నేహితులతో కలిసి బయటకు వెళ్తున్నట్లు కుటుంబ సభ్యులకు చెప్పి ఇంటి నుంచి వెళ్లాడు. మధుకుమార్‌తోపాటు అతడి స్నేహితులంతా కలిసి గ్రామంలోని ఓ వ్యక్తి ఇంటి వద్ద పాటలు పెట్టుకొని డ్యాన్స్‌లు చేస్తూ సంబరాలు చేసుకున్నారు. మంగళవారం తెల్లవారుజామున 2.30 గంటల సమయంలో మధుకుమార్‌ విద్యుదాఘాతానికి గురై అక్కడికక్కడే తుదిశ్వాస విడిచారు. మధుకుమార్‌ వనపర్తి జిల్లాలోని ఓ కళాశాలలో ఇంటర్మీడియట్‌ ద్వితీయ సంవత్సరం చదువుతున్నాడు. అలంపూర్‌ ప్రభుత్వ ఆసుపత్రిలో మరణోత్తర పరీక్ష పూర్తవగానే మృతదేహాన్ని కుటుంబ సభ్యులకు అప్పగించారు. మృతుడి తండ్రి కురుమన్న ఫిర్యాదు మేరకు కేసు నమోదు చేసి దర్యాప్తు చేస్తున్నట్లు ఎస్సై పేర్కొన్నారు.