హంస వాహనంపై శ్రీనివాసుడి విహారం

గర్భాలయం నుంచి మెట్లదారి గుండా శ్రీనివాసుణ్ని

హంస వాహనంలో ఊరేగింపునకు తీసుకొస్తున్న అర్చకులు

మహబూబ్‌నగర్‌ గ్రామీణం, న్యూస్‌టుడే : మన్యంకొండ బ్రహ్మోత్సవాల్లో భాగంగా రెండో రోజు బుధవారం పద్మావతి, అలివేలుమంగ సమేత శ్రీనివాసుడు హంస వాహనంపై మన్యంకొండ వీధుల్లో భక్తులకు కనువిందు చేశాడు. గర్భాలయ మండపంలో ప్రత్యేకంగా అలంకరించిన హంస వాహనంపై కొలువుదీర్చి ప్రత్యేక పూజల అనంతరం గర్భాలయ మెట్లదారి గుండా తేరు మైదానం వైపు నాగశేషుడి ఆలయం వరకు గోవింద నామస్మరణల మధ్య ఊరేగింపుగా తెచ్చారు. హంసవాహనంలో ఊరేగుతున్న స్వామిని అడుగడుగునా భక్తులు దర్శించుకొని తరించారు. నాగశేషుడి ఆలయంలో పూజలు అందుకున్న స్వామివారు తిరిగి గర్భాలయానికి హంసవాహనంపై వెనుదిరిగారు. దేవస్థానం వంశపారంపర్య ధర్మకర్త అలహరి మధుసూదన్‌కుమార్‌, కార్యనిర్వహణాధికారి శ్రీనివాసరాజు, పర్యవేక్షణాధికారి నిత్యానందచారి, ఆలయ అర్చకులు నర్సింహయ్య, జగదీష్‌, రాఘవేంద్రస్వామి, పాలక మండలి సభ్యులు, భక్తులు పాల్గొన్నారు.