ప్రశ్న పత్రాల లీకేజీ : మరొకరి అరెస్టు

గండీడ్‌, న్యూస్‌టుడే : టీఎస్‌పీఎస్సీ ప్రశ్నపత్రం లీకేజీ వ్యవహారం రోజుకో మలుపు తిరుగుతోంది. గండీడ్‌ మండలంలో ఇప్పటికే రేణుకతో పాటు ఆమె భర్త డాక్యనాయక్‌, రాజేశ్వర్‌, గోపాల్‌, నీలేశ్‌, శ్రీనివాస్‌లను సిట్‌ అధికారులు అదుపులోకి తీసుకొని విచారణ చేపట్టి వివరాలు సేకరిస్తున్నారు. తాజాగా ఉపాధిహామీ పథకం సాంకేతిక సహాయకుడిగా పనిచేసే గండీడ్‌ మండలం సల్కర్‌పేట్‌ గ్రామానికి చెందిన తిరుపతయ్యను అరెస్టు చేయటం చర్చనీయాంశమైంది. డాక్య నాయక్‌తో సంబంధం ఉండటంతో అతడిని అదుపులోకి తీసుకున్నారని విశ్వసనీయ సమాచారం. ఇప్పటివరకు మండలంలో ఏడుగురు అరెస్టు అయ్యారు. పేపర్‌ లీకేజీ వ్యవహారంలో గండీడ్‌ మండలంలో ఇంకా ఎంత మంది ఉన్నారోనన్న చర్చ సర్వత్రా జరుగుతోంది.