పూర్తయ్యేదెన్నడో.. పంపిణీ చేసేదెప్పుడో..?

పైప్‌లైన్‌ ఏర్పాటుకు తవ్వి వదిలేశారిలా..

పేదలకు సొంతింటి కల నెరవేర్చేందుకు చర్యలు తీసుకుంటున్నామని రాష్ట్ర ప్రభుత్వం చెబుతున్నా క్షేత్ర స్థాయిలో మాత్రం అవి కనిపించడం లేదు. అధికారుల నిర్లక్ష్యం కారణంగా ఏళ్ల తరబడి ఇళ్ల నిర్మాణ పనులు నత్తనడకన సాగుతున్నా పట్టించుకునే వారే కరవయ్యారని లబ్ధిదారులు వాపోతున్నారు. వెల్దుర్తి మండలం ఉప్పులింగాపూర్‌లో నాలుగేళ్ల క్రితం రెండు పడక గదుల ఇళ్ల నిర్మాణానికి అధికారులు పనులు చేపట్టినా నేటికీ పూర్తికాలేదు. ఇక్కడ 50 ఇళ్లు మంజూరు కాగా జీ+1 పద్ధతిన ఇళ్లు నిర్మించగా ఇంకా పనులు కొనసాగుతూనే ఉన్నాయి. మురుగు కాలువలు, సీసీ రోడ్లు నిర్మించలేదు. కిటికీలకు అద్దాలు బిగించలేదు. శౌచాలయాల పనులు కూడా అసంపూర్తిగా ఉన్నాయి. మిషన్‌ భగీరథ నీటి సరఫరా పైప్‌లైన్‌ ఏర్పాటుకు కాల్వలు తవ్వి వదిలేశారు. ప్రస్తుతం ఇక్కడ ఎలాంటి పనులు జరగడంలేదు. సంబంధిత అధికారులు స్పందించి చర్యలు తీసుకోవాలని గ్రామస్థులు కోరుతున్నారు. ఈ విషయమై పీఆర్‌ ఏఈ శ్రీనివాస్‌ను ‘న్యూస్‌టుడే’ వివరణ కోరగా.. ప్రతిపాదనలు పంపించామని, నిధులు మంజూరవగానే పనులు ప్రారంభిస్తామన్నారు.

- న్యూస్‌టుడే, వెల్దుర్తి