సమ్మక్క సారలమ్మ జాతర సందడి షురూ..

భారీగా దిగుమతి  అవుతున్న బెల్లం

హుస్నాబాద్‌లో లారీలో నుంచి బెల్లంను దించుతున్న కూలీలు

న్యూస్‌టుడే, హుస్నాబాద్‌: రెండేళ్లకు ఒకసారి జరిగే సమ్మక్క సారలమ్మ జాతరకు అవసరమైన బంగారం (బెల్లం) నిల్వలు దిగుమతి అవుతున్నాయి. ఫిబ్రవరి 16 నుంచి 19 వరకు జరిగే జాతరలో మొక్కులు తీర్చుకునేందుకు ఇప్పటి నుంచే సిద్ధం అవుతుండగా హుస్నాబాద్‌ పట్టణంలో బెల్లం దిగుమతి భారీ ఎత్తున అవుతోంది. కామారెడ్డి, నిజామాబాద్‌ పరిసరాల నుంచి సరఫరా అవుతుండగా హుస్నాబాద్‌, అక్కన్నపేట, కోహెడ మండలాల భక్తులు ఇక్కడ కొనుగోలు చేస్తుంటారు. జాతర పూర్తయ్యే వరకు ఇక్కడ బెల్లం కొనుగోళ్ల సందడి భారీగా ఉంటుంది. ప్రతి కుటుంబం వన దేవతలైన సమ్మక్క సారలమ్మలను పూజించి నిలువెత్తు బంగారం (బెల్లం) సమర్పించుకోవడం ఆనవాయితీగా వస్తోంది. గత జాతర సమయంలో దాదాపు 20 లారీల బెల్లం విక్రయించినట్లు స్థానిక వ్యాపారులు చెబుతున్నారు. శుక్రవారం నుంచి నిలువెత్తు తూకాలు ప్రారంభం కానుండగా అనంతరం ఇంట్లో వేడుక నిర్వహించి వీలునుబట్టి మేడారం వెళతారు. అక్కడి వరకు వెళ్లలేని వారు భక్తులు పరిసర గ్రామాల్లో జరిగే జాతరలో పాల్గొని మొక్కులు తీర్చుకుంటారు. ఇదివరకు బెల్లం విక్రయాలపై ఆబ్కారీ శాఖ ఆంక్షలు అమలు చేయగా ప్రస్తుతం సడలించినట్లుగా చెబుతున్నారు.