రోడ్డు ప్రమాదంలో ఇద్దరు మృతి

జిన్నారం: ఐడీఏ బొల్లారం శివారులోని బాహ్యవలయ రహదారిపై జరిగిన రోడ్డు ప్రమాదంలో ఇద్దరు మృతి చెందారు. స్థానిక సీఐ జి.ప్రశాంత్‌ కథనం ప్రకారం.. ఐడీఏ బొల్లారం శివారులోని మోడల్‌ స్కూల్‌ సమీపంలో రింగురోడ్డుపై మొక్కలకు నీళ్లు పడుతుండగా వెనక నుంచి వచ్చిన కారు బలంగా ఢీకొంది. దీంతో ట్యాంకర్‌ క్లీనర్‌ నవీన్‌(19), ఒప్పంద కార్మికుడు సత్తయ్య(50) అక్కడికక్కడే మృతి చెందారు. కారును నడుపుతున్న మహేశ్వర్‌రెడ్డి స్వల్ప గాయాలతో బయటపడ్డాడు. మృతదేహాలను పంచనామా నిమిత్తం పటాన్‌చెరు ప్రభుత్వ ఆసుపత్రికి తరలించారు. అతివేగమే ప్రమాదానికి కారణమని స్థానికులు తెలిపారు. పోలీసులు కేసు నమోదు చేసి దర్యాప్తు చేస్తున్నారు.