కష్టపడితేనే ఉజ్వల భవిత

మెదక్‌, న్యూస్‌టుడే: పదో తరగతి పరీక్షలు సమీపిస్తున్నాయని, విద్యార్థులు ఎలాంటి ఒత్తిడికి లోనుకావొద్దని జిల్లా విద్యాధికారి రమేశ్‌కుమార్‌ సూచించారు. గురువారం మెదక్‌ పట్టణంలోని ఓ ప్రైవేటు ఫంక్షన్‌హాలులో పది విద్యార్థులకు ప్రేరణ తరగతులు నిర్వహించారు. దీనికి ముఖ్యఅతిథిగా హాజరైన డీఈవో మాట్లాడుతూ.. విద్యార్థి దశలో కష్టపడితే ఉజ్వలమైన భవిత సాధ్యమవుతుందన్నారు. ప్రతి విద్యార్థి లక్ష్యాన్ని నిర్దేశించుకొని అందుకు అనుగుణంగా కఠోర సాధన చేయాలని చెప్పారు. ప్రశాంతంగా పరీక్షలు రాయాలని తెలిపారు. అనంతరం జాతీయ ఉత్తమ స్పీకర్‌ అవార్డు గ్రహీత సాయిరాహుల్‌రెడ్డి విద్యార్థుల్లో భయం పోగొట్టేలా, స్ఫూర్తి నింపేలా సందేశం ఇచ్చారు. పలు అంశాలపై అవగాహన కల్పించారు. ఎంఈవో నీలకంఠం, ప్రధానోపాధ్యాయురాలు రేఖ, ఉపాధ్యాయులు దేశపతి కృష్ణమూర్తి, మల్లారెడ్డి, పూర్ణచందర్‌, రవీందర్‌, విజయ్‌ పాల్గొన్నారు.