2019-వాహన చట్టం రద్దు చేయాలని నిరసన

జిల్లా రవాణా శాఖ కార్యాలయం వద్ద నినాదాలు చేస్తూ..

సిద్దిపేట అర్బన్‌, న్యూస్‌టుడే: 2019-వాహన చట్టాన్ని రద్దు చేయాలని, ఫిట్‌నెస్‌ రెన్యువల్‌ పేరిట తీసుకువచ్చిన జీవో 714ను ఉపసంహరించుకోవాలని సీఐటీయూ జిల్లా కార్యదర్శి గోపాలస్వామి, తెరాసవి జిల్లా అధ్యక్షుడు అరవింద్‌ డిమాండ్‌ చేశారు. ఈ మేరకు సిద్దిపేటలోని ముస్తాబాద్‌ చౌరస్తా నుంచి జిల్లా రవాణా శాఖ కార్యాలయం వరకు ఆటోల ర్యాలీ నిర్వహించి నిరసన వ్యక్తం చేశారు. అనంతరం వారు మాట్లాడుతూ.. రవాణా రంగాన్ని కార్పొరేట్‌ శక్తులకు అప్పగించే ప్రయత్నాలను కేంద్ర ప్రభుత్వం విరమించుకోవాలన్నారు. నూతన వాహన చట్టం పేరిట రోడ్‌ సేప్టీ బిల్లు పేరుతో అధికంగా చలాన్లు విధిస్తూ చోదకులను ఇబ్బందులకు గురి చేస్తున్నారన్నారు. చమురు ధరలు తగ్గించాలని, బ్యాడ్జి నంబరు పునరుద్ధరణపై జరిమానా మినహాయింపు ఇవ్వాలని డిమాండ్‌ చేశారు. ఈ సందర్భంగా కార్యాలయ అధికారి దుర్గాప్రసాద్‌కు వినతిపత్రం అందజేశారు. సీఐటీయూ, తెరాసకేవీ నాయకులు రవికుమార్‌, శ్రీనివాస్‌, కిట్టు, భాస్కర్‌, తిరుపతి, కరీం, కిషన్‌, ఆంజనేయులు, సాదిక్‌, రాఘవులు, పాషా, సురేందర్‌ తదితరులు ఉన్నారు.