‘బిట్‌కాయిన్‌’ పేరుతో సైబర్‌ మోసం

నగదు బదిలీ కాకుండా నిలిపిన పోలీసులు

న్యూస్‌టుడే, కొండపాక: సైబర్‌ నేరస్థుల చేతిలో మోసపోయిన మహిళ సకాలంలో స్పందించడంతో నగదు చేజారకుండా పోలీసులు ఫ్రీజ్‌ చేశారు. సిద్దిపేట కమిషనర్‌ శ్వేత తెలిపిన వివరాలు.. కొండపాక మండలం మేధినీపూర్‌ గ్రామానికి చెందిన గడ్డం భవాని తన మిత్రుడి ఇన్‌స్టాగ్రామ్‌ ఖాతా ఐడీ నుంచి సైబర్‌ నేరగాడు బిట్‌కాయిన్‌లో రూ.50 వేలు పెట్టుబడి పెడితే గంటలో రూ.4 లక్షలు వస్తాయని రాశాడు. నమ్మిన భవాని.. మరో నంబరుకు రూ.50 వేలు ఫోన్‌పే చేసింది. డబ్బులు రావాలంటే మరో రూ.30 వేలు పంపించమని చెప్పడంతో మళ్లీ ఆమె పంపింది. తర్వాత ఇన్‌స్టాగ్రామ్‌ ఖాతా బ్లాక్‌ అవడం గమనించింది. అనుమానంతో మిత్రుడికి ఫోన్‌ చేయగా రెండు నెలల క్రితమే ఎవరో హ్యాక్‌ చేసినట్లు చెప్పాడు. వెంటనే ఆమె జాతీయ హెల్ప్‌లైన్‌ నంబర్‌ 1930కు ఫిర్యాదు చేసింది. సంబంధిత యంత్రాంగం రూ.80 వేలను నేరగాడి ఖాతాకు బదిలీ కాకుండా నిలుపుదల చేశారు. ఇప్పటివరకు సైబర్‌ నేరాల్లో పోగొట్టుకున్న మొత్తం రూ.80 లక్షలను నిలుపుదల చేశామని సీపీ వివరించారు.