పౌల్ట్రీ పరిశ్రమను మోసగించిన రైతు.. కేసు నమోదు

నంగునూరు, న్యూస్‌టుడే: పెంచి పోషించమని ఇచ్చిన కోళ్లను గడువు తర్వాత పరిశ్రమకు అప్పగించకుండా దుర్బుద్ధితో సొంతంగా రైతు అమ్మేసుకున్నాడు. పోలీసులకు పరిశ్రమ ప్రతినిధి ఫిర్యాదు చేయగా కేసు నమోదైంది. సిద్దిపేట జిల్లా రాజగోపాలపేట ఠాణా ఎస్‌ఐ మహిపాల్‌రెడ్డి తెలిపిన వివరాలు.. నంగునూరు గ్రామానికి చెందిన పల్లపు రాజు తన కోళ్లఫారంలోకి మే 23న సుగుణ కంపెనీకి చెందిన 6,393 కోడి పిల్లలను పెంపకానికి తెచ్చుకున్నాడు. కోడి పిల్లలకు దాణా, మందులు తదితరాలను కంపెనీ సరఫరా చేసింది. మాంసానికి సిద్ధమైన కోళ్లను తీసుకెళ్లేందుకు గత శనివారం పరిశ్రమ ప్రతినిధి వచ్చారు. మరుసటి రోజు రమ్మని రాజు చెప్పాడు. ఆదివారం మరోసారి వచ్చి చూడగా ఫారంలో కోళ్లు కనిపించలేదు. పలు చోట్ల వెతికినా ఫలితం లేదు. సోమవారం వరకు రాజు అందుబాటులోకి రాలేదు. కోళ్లను వాహనంలోకి ఎక్కించుకొని అమ్ముకోవడానికి తీసుకెళ్లాడని గ్రహించిన పరిశ్రమ బ్రాంచి మేనేజర్‌ ఎం.సంతకుమార్‌ పోలీసులకు ఫిర్యాదు చేశారు. మొత్తం రూ.15.66 లక్షల మేర నష్టపోయానని ఫిర్యాదులో పేర్కొన్నారు. ఈ మేరకు కేసు నమోదు చేసి దర్యాప్తు చేపట్టామని ఎస్‌ఐ వివరించారు.