దుర్గమ్మకు బోనం.. పరవశించిన భక్తజనం..

అమ్మవారికి హారతి ఇస్తున్న ఎమ్మెల్సీ కవిత, ఎమ్మెల్యే పద్మాదేవేందర్‌రెడ్డి,
మహిళా కమిషన్‌ ఛైర్‌పర్సన్‌ సునీతాలక్ష్మారెడ్డి, తదితరులు

పాపన్నపేట, న్యూస్‌టుడే: ప్రసిద్ధ పుణ్యక్షేత్రం ఏడుపాయల వనదుర్గామాతకు దేవీ శరన్నవరాత్రోత్సవాలలో భాగంగా ఆరోరోజు శనివారం ఘనంగా బోనాల ఊరేగింపు నిర్వహించారు. అమ్మవారిని ముదురు నీలం రంగు చీరలో కాత్యాయని దేవీగా అలంకరించి భక్తలకు దర్శనం కల్పించారు. గోకుల్‌షెడ్డులో ప్రతిష్ఠించిన ఉత్సవమూర్తికి పూజలు జరిగాయి. ఎమ్మెల్సీ కవిత, మెదక్‌ ఎమ్మెల్యే పద్మాదేవేందర్‌రెడ్డి ఆధ్వర్యంలో భక్తులు 108 బోనాలను డప్పుచప్పుళ్ల మధ్య నృత్యాలతో ఆలయం వరకు ఊరేగింపుగా తీసుకొచ్చారు. గర్భాలయంలో అమ్మవారికి ప్రత్యేక పూజలు చేసి బోనాలు సమర్పించారు. సింగూరు ప్రాజెక్టు నుంచి శుక్రవారం రాత్రి దిగువకు నీటిని విడుదల చేయడంతో వనదుర్గా ప్రాజెక్టుకు చేరడంతో ఆలయం వద్ద వరద ప్రవాహం కొనసాగుతోంది. స్వల్పంగా వరద ఉండటంతో గర్భగుడిలోకి భక్తులను అనుమతించారు. సింగూరు నుంచి 10800 క్యూసెక్కుల వరద దిగువకు వదులుతుండగా, వనదుర్గా ప్రాజెక్టు నుండి 10400 క్యూసెక్కుల మేర కిందికి వదులుతున్నట్లు నీటిపారుదల అధికారులు తెలిపారు.