చిరుత దాడి.. బెంబేలెత్తిన జనం

ఘటనాస్థలిలో పరిశీలిస్తున్న అటవీశాఖ అధికారులు

నర్సాపూర్‌ రూరల్‌: మండలంలోని నత్నాయిపల్లి సమీపంలోని అటవీప్రాంతంలో పులి సంచారంతో గ్రామస్థులు భయాందోళనకు గురవుతున్నారు. పొలంలో కట్టేసిన మూడు గేదె దూడలపై దాడి చేసి చంపింది. రైతు అటవీశాఖ అధికారులు తెలిపిన ప్రకారం వివరాలు.. సంగన్నగారి ప్రవీణ్‌కుమార్‌ పొలం వద్ద పాడి గేదెలను ఉంచి పాలు తీసుకుని వస్తాడు. ఎనిమిది పాడి గేదెలు, మూడు దూడలు ఉన్నాయి. సోమవారం రాత్రి పాలు తీసుకుని వచ్చాడు. మంగళవారం ఉదయం వెళ్లగా దూడలు కనిపించలేదు. సమీపంలోని ఓ చెట్టుపై రెండు దూడలు వేలాడుతున్నాయి. మరికొంత దూరంలో మరో దూడ కళేబరం ఉందని ఆవేదన వ్యక్తం చేశాడు. సమాచారం అందుకున్న అటవీశాఖ అధికారులు సెక్షన్‌ అధికారి బాలేశం, బీట్‌ అధికారి ప్రశాంత్‌కుమార్‌ ఘటనాస్థలానికి వెళ్లి పరిశీలించి చిరుతగా గుర్తించారు. ఉన్నతాధికారులకు నివేదిస్తామని, బాధితుడికి నష్టపరిహారం అందేలా చూస్తామన్నారు. ఈ ఘటనతో నత్నాయిపల్లి గ్రామస్థులు ఒక్కసారిగా భయందోళన చెందుతున్నారు. రైతులు పొలాలకు వెళ్లేందుకు భయపడుతున్నారు. అటవీశాఖ అధికారులు చర్యలు చేపట్టాలని కోరుతున్నారు.