Harish rao: కేంద్రం నిధులు ఆపటంపై బండి సంజయ్‌ సమాధానం చెప్పాలి: మంత్రి హరీశ్‌రావు

సిద్దిపేట: సీఎం కేసీఆర్ అడగ్గానే కొత్త మండలాలు ఏర్పాటు చేశారని మంత్రి హరీశ్‌రావు తెలిపారు. సిద్దిపేట జిల్లా భూంపల్లి, అక్బర్‌పేట్‌లో ఇవాళ పర్యటించిన మంత్రి.. కొత్త మండలాల్లో ఏర్పాటు చేసిన తహశీల్దార్‌ కార్యాలయాలను ప్రారంభించారు. ఈ సందర్భంగా ఆయన మాట్లాడుతూ.. మోదీ ఫొటోలు పెట్టట్లేదని భాజపా నేతలు గొడవలు చేస్తున్నారని తీవ్రంగా మండిపడ్డారు.

‘‘గ్యాస్‌, పెట్రోల్‌ ధరలు పెంచినందుకు మోదీ ఫొటోలు పెట్టుకోండి. చేనేత వస్త్రాలపై జీఎస్టీ వేసినందుకు ఫొటోలు వేసుకోండి’’ అని భాజపా నేతలను ఉద్దేశించి వ్యాఖ్యానించారు. రైతుల మోటార్లకు మీటర్లు పెట్టనని సీఎం కేసీఆర్‌ ఖరాఖండిగా చెప్పారని.. అందుకే రాష్ట్రానికి రావాల్సిన రూ.6వేల కోట్ల నిధులు ఆపేశారని ధ్వజమెత్తారు. కేంద్రం నిధులు ఆపటంపై భాజపా రాష్ట్ర అధ్యక్షుడు బండి సంజయ్‌ సమాధానం చెప్పాలని డిమాండ్‌ చేశారు. తెలంగాణలో రైతులకు ఉచిత విద్యుత్‌ ఇస్తే కేంద్రం ఓర్వలేకపోతోందన్నారు. కేంద్రం ధాన్యం కొనుగోలు చేయనంటే రాష్ట్ర ప్రభుత్వమే కొని రైతులకు అండగా నిలిచిందని చెప్పారు. మహారాష్ట్రలోని సరిహద్దు గ్రామాల సర్పంచ్‌లు తమ గ్రామాలను తెలంగాణలో కలపాలని విజ్ఞప్తులు చేస్తున్నారని మంత్రి హరీశ్‌రావు ఈ సందర్భంగా తెలిపారు.