ఉన్నత చదువుకు ఆర్థిక భరోసా

నగదు అందిస్తున్న తిరుపతి రెడ్డి

చిన్నశంకరంపేట, న్యూస్‌టుడే: మండల పరిధి శాలిపేట గ్రామానికి చెందిన శ్రీజ ఆర్థిక ఇబ్బందులతో పదోతరగతి వరకు చదువు మానేసింది. కొన్ని నెలల క్రితం తండ్రి రమేష్‌ అనారోగ్యంతో మృతి చెందాడు. ఈ క్రమంలో తల్లి ఆరోగ్యం క్షీణించి మంచానికే పరిమితమైంది.  ఇంటర్‌ మెదటి సంవత్సరంలో చేరినా కుటుంబ బాధ్యత శ్రీజపై పడటంతో చదువు మానేసి ఇంట్లోనే ఉంటూ బీడీలు చుడుతూ కుటుంబాన్ని పోషిస్తోంది. గ్రామస్థులు ఈ విషయాన్ని కాంగ్రెస్‌ పార్టీ జిల్లా అధ్యక్షుడు తిరుపతి రెడ్డి దృష్టికి తీసుకెళ్లగా శనివారం బాధిత కుటుంబాన్ని పరామర్శించి రూ.5వేలు అందించాడు. ఈ ఆర్థికసాయం ప్రతి నెల మీ ఇంటికి చేరుతుందని ఉన్నత చదువులకు చదువుకోవాలని, ఇందుకయ్యే ఖర్చు అందజేస్తానని శ్రీజకు మనోధైర్యాన్ని ఇచ్చాడు. చదువుపై దృష్టి సారించి ఉన్నత స్థాయిలో ఉండాలన్నారు. పార్టీ మండలాధ్యక్షుడు రమణ, వైస్‌ఎంపీపీ సత్యనారాయణ నాయకులు ఆంజనేయులు, ప్రభాకర్‌ రెడ్డి తదితరులు పాల్గొన్నారు.