పారదర్శక బదిలీలకు డిమాండ్‌

వినతిపత్రం ఇస్తున్న ఉపాధ్యాయ సంఘాల పోరాట కమిటీ నేతలు

మెదక్‌, న్యూస్‌టుడే: ఉపాధ్యాయుల బదిలీలు, పదోన్నతుల ప్రక్రియను పారదర్శకంగా చేపట్టాలని వివిధ ఉపాధ్యాయ సంఘాల నాయకులు డిమాండ్‌ చేశారు. శనివారం ఉపాధ్యాయ సంఘాల పోరాట కమిటీ బాధ్యులు సంగయ్య, వెంకటరామిరెడ్డి, పద్మారావు, శ్రీనివాస్‌రావు, అజయ్‌కుమార్‌, పీఆర్టీయూ, ఎస్టీయూ జిల్లా అధ్యక్ష, కార్యదర్శులు శ్రీనివాస్‌, కృష్ణ, ప్రణీద్‌కుమార్‌, రాజ్‌గోపాల్‌గౌడ్‌ అదనపు పాలనాధికారి ప్రతిమాసింగ్‌ను వేర్వేరుగా కలిసి వినతిపత్రాలు అందజేశారు. రాజకీయ పైరవీలు సాగుతున్నాయని, దీనికి అడ్డుకట్ట వేయాలని విజ్ఞప్తి చేశారు. వెబ్‌ కౌన్సిలింగ్‌ ద్వారా ప్రక్రియ సాగించాలని కోరారు. ఎల్‌ఎఫ్‌ఎల్‌ హెచ్‌ఎం పదోన్నతికి విడుదల చేసిన సీనియార్టీ జాబితాలో నిబంధనలకు విరుద్ధంగా డీఈడీ, టీటీసీ అర్హతలు లేని ఉపాధ్యాయులను చేర్చారన్నారు. దాన్ని సవరించి అర్హుల పేర్లను చేర్చాలని రాష్ట్రోపాధ్యాయ సంఘం నాయకులు కోరారు.

ఎస్టీలకు జీవో 33 ద్వారా పెంచిన పదిశాతం రిజర్వేషన్లు ఉపాధ్యాయ పదోన్నతులు, ఖాళీల భర్తీలో సైతం అమలు చేయాలని ఎస్సీ, ఎస్టీ ఉపాధ్యాయ సంఘం జిల్లా అధ్యక్ష, కార్యదర్శులు తారాసింగ్‌, చెదల్‌ భాస్కర్‌ అదనపు పాలనాధికారిణిని కలిసి వినతిపత్రం అందజేశారు.