ప్రజలకు మెరుగైన సేవలు అందించాలి: సీపీ

పోలీసు ఠాణాను పరిశీలిస్తున్న శ్వేత

సిద్దిపేట అర్బన్‌, న్యూస్‌టుడే: ప్రజలకు ఎల్లవేళల అందుబాటులో ఉండి ఉత్తమ సేవలు అందించాలని పోలీసు సిబ్బందికి సీపీ శ్వేత సూచించారు. సిద్దిపేట గ్రామీణ ఠాణాను శనివారం ఆమె సందర్శించారు. ఈ సందర్భంగా ఆమె మాట్లాడుతూ.. ఠాణా పరిసరాలను ఆహ్లాదకరంగా ఉంచాలని, రికార్డులను జాగ్రత్తగా భద్రపరచాలని, విధి నిర్వహణలో సిబ్బంది పోటీపడి పనిచేయాలని సూచించారు. ఫిర్యాదుదారులతో సిబ్బంది మర్యాదపూర్వకంగా మాట్లాడి సాధక బాధకాలను విన్న తర్వాత వారు ఇచ్చే దరఖాస్తుపై చట్టపరమైన చర్యలు తీసుకోవాలని సూచించారు. సీపీ వెంట డీసీపీ మహేందర్‌, ఏసీపీ దేవారెడ్డి, సీఐ జానకిరాంరెడ్డి, ఎస్‌ఐ కిరణ్‌రెడ్డి సిబ్బంది ఉన్నారు.
సిద్దిపేట టౌన్‌, న్యూస్‌టుడే: ఏకాగ్రత, ఆత్మవిశ్వాసం పెంచుకోవడానికి ప్రతీరోజు వ్యాయామం చేయాలని పోలీసు కమిషనర్‌ శ్వేత సూచించారు. క్రమం తప్పకుండా వాకింగ్‌, రన్నింగ్‌ చేయాలన్నారు. సమతుల్య ఆహారం తీసుకుంటూ శరీరానికి శ్రమ కల్పించాలన్నారు. కమిషనరేట్‌ పరిధిలోని పోలీసు అధికారులు, సిబ్బంది ఆరోగ్యంగా ఉండాలని 5కె, 10కె హాఫ్‌ మారథాన్‌, మారథాన్‌ పరుగుపై శనివారం అవగాహన కార్యక్రమం నిర్వహించారు. ఈ సందర్భంగా మారథాన్‌ శిక్షకుడు నిరంజన్‌ పరుగుకు సంబంధించిన మెలకువలు పవర్‌ పాయింట్‌ ప్రజంటేషన్‌ ద్వారా వివరించారు. 8 వారాల పాటు రన్నింగ్‌ సాధన చేసిన తర్వాతే 5కె, 12 వారాల తర్వాత 10కె, 24 వారాల తర్వాత హాఫ్‌ మారథాన్‌, మారథాన్‌ సాధన చేయాలని సూచించారు. వారానికి నాలుగు రోజులు రన్నింగ్‌, మూడు రోజులు వాకింగ్‌ చేయాలన్నారు. కార్యక్రమంలో అదనపు డీసీపీ మహేందర్‌, డీసీపీలు రామచంద్రరావు, సుభాష్‌ చంద్రబోస్‌, రమేశ్‌, ఫణిందర్‌, ఎస్బీ ఇన్స్‌పెక్టర్‌ రఘుపతిరెడ్డి, తదితరులు పాల్గొన్నారు.