మెట్టుదిగని యాజమాన్యం.. పట్టు వదలని కార్మికులు

ట్రైడెంట్‌ పరిశ్రమ ఎదుట నినాదాలు చేస్తున్న కార్మికులు

జహీరాబాద్‌, న్యూస్‌టుడే: జహీరాబాద్‌ సమీపంలోని ట్రైడెంట్‌ చక్కెర పరిశ్రమ కార్మికుల నిరసన గురువారంతో మూడో రోజుకు చేరింది. రెండేళ్లుగా రావాల్సిన పీఎఫ్‌, ఎల్‌ఐసీ బకాయిలు దాదాపు రూ.2 కోట్లను ఒకేసారి చెల్లించాలని కోరుతూ కార్మికులు మూడు రోజుల క్రితం కర్మాగారం ప్రధాన ద్వారం ముందు బైఠాయించారు. విడతల వారీగా చెల్లిస్తామని, నిరసన విరమించాలని కర్మాగారం అధికారులు చేసిన ప్రయత్నాలు విఫలమయ్యాయి. ఇందులో భాగంగా బుధవారం వరకు రూ.50లక్షలు విడుదల చేయడమే కాకుండా, గురువారం మరో రూ.25 లక్షలు విడదల చేస్తామని అధికారులు ప్రకటించినా కార్మికులు పట్టు వీడకుండా గురువారం తమ నిరసనను కొనసాగించారు. కార్మికులు రేయింబవళ్లు ప్రధాన ద్వారం ముందు బైఠాయించడంతో కర్మాగారంలోని ఉత్పత్తులను తరలించే లారీలు లోపలే నిలిచిపోయాయి. గురువారం మధ్యాహ్నం ప్రధాన ద్వారం వద్దకు చేరుకున్న పోలీసులు నిరసనకారులను తరలించేందుకు ప్రయత్నించగా కార్మికులు ప్రతిఘటించారు. వీరికి కార్మిక సంఘం నాయకుడు, భారాస జహీరాబాద్‌ మండల అధ్యక్షుడు ఎం.జి.రాములుతో పాటు.. పలువురు కార్మికులు మద్దతు తెలిపారు.