కార్యకర్తపై భాజపా నేత బాబూమోహన్‌ పరుష పదజాలం

సామాజిక మాధ్యమాల్లో వైరల్‌ అయిన వ్యాఖ్యలు

జోగిపేట టౌన్‌: ప్రపంచ స్థాయి నేతను.. నువ్వెంత నీ బతుకెంత అంటూ భాజపా కార్యకర్తపై మాజీ మంత్రి, అందోలు మాజీ ఎమ్మెల్యే బాబూమోహన్‌ చరవాణిలో సంబోధించిన వ్యాఖ్యలు మంగళవారం సామాజిక మాధ్యమాల్లో వైరల్‌ అయ్యాయి. సంగారెడ్డి జిల్లా జోగిపేట పట్టణానికి చెందిన వెంకటరమణ అందోలు నియోజకవర్గ కార్యకర్త. భాజపా రాష్ట్ర నాయకుడు బాబూమోహన్‌కు ఆయన ఫోన్‌ చేసి మీతోకలిసి పార్టీలో పనిచేస్తానని చెప్పారు. దీంతో ఒక్కసారిగా ఆయన దూషించడం మొదలు పెట్టారు. నేను మంత్రిగా ఉన్నప్పుడే అందోలును అభివృద్ధి చేశానని, నువ్వెంత అని, ఫోన్‌ పెట్టేయి అంటూ ఆగ్రహం వ్యక్తం చేశారు. బండి సంజయ్‌ ఎవరు.. నా తమ్ముడు అంటూ..  ఇంకోసారి నాకు ఫోన్‌ చేస్తే  జాగ్రత్త అంటూ హెచ్చరించిన మాటలు రికార్డయ్యాయి. ఈ విషయమై బాబూమోహన్‌ను ‘న్యూస్‌టుడే’ వివరణ కోరగా.. ‘ఆ మాటలు నావి కావు... నేను ఎవరికీ ఫోన్‌ చేయలేదు. నాకు ఎవరూ ఫోన్‌ చేయలేదు. ఎన్నికలు సమీపిస్తున్న సమయంలో కావాలనే ఓ రాజకీయ నాయకుడు బురదజల్ల్లే ప్రయత్నమని అనుకుంటున్నా. రమణ అనే కార్యకర్తను దూరం పెట్టి దాదాపు రెండేళ్లవుతోంది. రాష్ట్ర అధ్యక్షుడితో మాట్లాడతా’నన్నారు.