రుణ యాప్‌ నిర్వాహకుల వేధింపులు.. ఆత్మహత్యాయత్నం

సిద్దిపేట టౌన్‌, న్యూస్‌టుడే: సిద్దిపేట టూటౌన్‌ పోలీస్‌ స్టేషన్‌ పరిధిలో ఓ మహిళ ఫ్యూచర్‌, సన్నీ, లోన్‌ స్టోర్‌, స్మార్ట్‌ వాలెట్‌ నుంచి రుణం తీసుకొని ప్రతి నెలా క్రమం తప్పకుండా చెల్లిస్తున్నారు. ఇటీవల ఆమె సోదరి చిత్రాలను సేకరించి అసభ్యంగా చిత్రీకరించి ఆమెను, కుటుంబ సభ్యులను మానసికంగా ఇబ్బంది పెడుతున్నారు. బాధితురాలి సోదరి గత వారం ఆత్మహత్యాయత్నానికి పాల్పడింది. అనంతరం 1930కి ఫిర్యాదు చేయగా కేసు నమోదైంది. హుస్నాబాద్‌లో ఓ యువతి వాట్సాప్‌ నెంబరును హ్యాక్‌ చేశారు. యువతి అడిగినట్టుగా ఆమె స్నేహితులను డబ్బు పంపించమన్నారు. వారిలో ఒకరు నమ్మి రూ.3000 పంపించాడు. మరిన్ని డబ్బులు కావాలని మెసేజీ రావడంతో హ్యాక్‌ అయిందని తెలుసుకున్నారు. ఇండియన్‌ పేమెంట్‌ బ్యాంక్‌ అనే పేరు చెప్పి.. ఓటీపీ తెప్పించుకొని ఓ బాధితుడి ఖాతా నుంచి రూ.7 వేలు సైబర్‌ నిందితులు లాగేసుకున్నారు. కుకునూరుపల్లిలోనూ ఓ వ్యక్తి ఖాతా నుంచి రూ.6 వేలు డెబిట్‌ అయ్యాయి. వీరు 1930 నంబరుకు ఫిర్యాదు చేశారు. సైబర్‌ మోసగాళ్ల నుంచి అప్రమత్తంగా ఉండాలని పోలీసులు సూచిస్తున్నారు.