శతమానం భవతి

మోతెలో కుటుంబ సభ్యుల మధ్య వందేళ్ల బాలమ్మ పుట్టినరోజు వేడుక

మిరుదొడ్డి, న్యూస్‌టుడే: సిద్దిపేట జిల్లా అక్బర్‌పేట-భూంపల్లి మండల పరిధి మోతె గ్రామంలో పప్పుల బాలమ్మకు వందో పుట్టినరోజును కుటుంబ సభ్యులు మంగళవారం నిర్వహించారు. బాలమ్మకు ముగ్గురు కుమార్తెలు, ఇద్దరు కుమారులు సహా 62 మంది కుటుంబ సభ్యులు ఉన్నారు. వారు వేడుకలో పాల్గొన్నారు. ఆమె భర్త రాజిరెడ్డి ఏడేళ్ల క్రితం మృతి చెందాడు. ఇప్పటికీ ఆమె కంటిచూపు, దంతాలు బాగున్నాయి. ప్రస్తుతం ఆమె కర్ర సాయంతో నడుస్తున్నారు. తన పని తాను సాఫీగా చేసుకోగలుగుతున్నారు. మొదటి నుంచీ ఆమె శాకాహారి. పూర్వకాలంలో తీసుకున్న సహజసిద్ధమైన ఆహారంలో సత్తువ ఉండేదని ఆమె చెప్పారు. మక్క గట్క ఎక్కువగా తీసుకునేదాన్నని చెప్పారు. కాలుష్య ప్రభావం తక్కువగా ఉండటంతో ఆరోగ్యకరంగా జీవిస్తున్నానని తెలిపారు. వ్యవసాయ పనులు చేయడంతో శారీరక, మానసిక దృఢత్వం ఉందన్నారు. ఇప్పటి తరం వారు ఎరువులు అధికంగా వాడిన ఆహారం తీసుకోవడంతో నాణ్యత తగ్గుతోందన్నారు. నాటి కాలంలో సరుకుల కొనుగోలు, అమ్మకాలు లేవని.. కేవలం బదలు తీసుకునేవారమని ఉప్పు మాత్రమే కొనేవారమని వివరించారు.