మహిళలు హక్కులను వినియోగించుకోవాలి

భువనగిరి: రాజ్యాంగంలో కల్పించిన హక్కులను మహిళలు పూర్తిస్థాయిలో వినియోగించుకున్నప్పుడే సాధికారతను సాధిస్తారని జిల్లా కలెక్టర్ పమేలా సత్పతి అన్నారు. ఆజాదీకా అమృత్‌ మహోత్సవంలో భాగంగా శనివారం మున్సిపల్‌ సమావేశ మందిరంలో ఏర్పాటు చేసిన న్యాయసేవలపై అవగాహన సదస్సును ఆమె ప్రారంభించి మాట్లాడారు. మహిళా చట్టాలపై పూర్తి అవగాహన కల్పించుకున్నప్పుడే జరుగుతున్న దాడులను ఎదుర్కోవచ్చన్నారు. జిల్లా అదనపు న్యాయమూర్తి ఎం.భవానీ మాట్లాడుతూ.. రాజ్యాంగం దేశంలో పౌరులందరికి సమాన హక్కులు కల్పించిందని తెలిపారు. మహిళల రక్షణ కోసం ప్రభుత్వం అనేక చట్టాలు కల్పించిందన్నారు. సమావేశంలో జిల్లా సహకార అధికారి పరిమళ, పరిశ్రమల అధికారి శ్రీలక్ష్మి, మార్కెటింగ్‌ అధికారి సబిత, ప్రత్యేక డిప్యూటీ కలెక్టర్ విజయకుమారి, ప్రజాప్రతినిధులు పాల్గొన్నారు.