యాదాద్రి క్షేత్రంలో విశిష్ట పర్వాలు

వేణుగోపాలస్వామి రూపంలో నారసింహుడు

యాదగిరిగుట్ట, న్యూస్‌టుడే: వేకువజామున తిరుప్పావై.. ఉదయం, రాత్రివేళలలో అలంకార సేవోత్సవం..గోదాదేవి కల్యాణోత్సవం.. సంప్రదాయ పర్వమైన ఊంజల్‌ సేవోత్సవం విశిష్ట పర్వాలతో భోగి పండుగ రోజున యాదాద్రి పుణ్యక్షేత్రం ఆధ్యాత్మికతను నింపుకొంది. అధ్యయనోత్సవాల్లో భాగంగా రెండోరోజైన శుక్రవారం శ్రీస్వామిని అలంకరించే పర్వాలను ఆలయ ఆచారంగా చేపట్టారు. ఉదయం మృగనరహరిని వేణుగోపాలస్వామిగా అలంకరించి పూజలు నిర్వహించారు. శ్రీస్వామి సేవోత్సవాన్ని బాలాలయ మండపంలో నిర్వహించారు. రాత్రివేళ స్వామిని గోవర్ధనగిరిదారిగా అలంకృతులను చేసి ఆచారంగా వేదమంత్రోచ్ఛరణలతో సేవా పర్వాన్ని కొనసాగించారు.

* సంప్రదాయంగా కొనసాగే పర్వాలలో భాగంగా అమ్మవారికి ప్రీతికరమైన శుక్రవారం సందర్భంగా ఊంజల్‌ సేవోత్సవాన్ని సాయంత్రంవేళ నిర్వహించారు. మంగళవాయిద్యాలు, కీర్తనల మధ్య కొనసాగిన ఊంజల్‌ సేవోత్సవంలో మహిళా బక్తులు పాల్గొని హారతులను నివేదించారు.